Manusura wa Lucky Vicent aliyefanyiwa upasuaji wa uti wa mgongo aonyesha dalili njema.

Manusura wa ajali ya Lucky Vincent, Doreen Mshana, amepata hisia katika miguu yake yote miwili, ikiwa ni siku chache tangu afanyiwe upasuaji mkubwa wa uti wa mgongo.Hiyo ni ishara kuwa upasuaji mkubwa wa uti wa mgongo aliofanyiwa, umefanikiwa.

Wenzake Wilson Tarimo na Saidia Ismael wameruhusiwa baada ya kupata matibabu na sasa wanaendelea na mazoezi ya viungo katika nyumba maalum kwa wagonjwa waliovunjika viungo jijini Sioux.Walikuwa wamelazwa katika Hospital ya Mercy Sioux City, Marekani walikokuwa wakipata matibabu baada ya ajali mbaya ya basi iliyoua wanafunzi wenzao 32, Mei 6 mwaka huu.

Mbunge wa Singida Kaskazini(CCM) Lazaro Nyalandu, amesema Doreen ameweza kuisogeza miguu yake miwili kwa mara ya kwanza tangu apate ajali hiyo.“Tuendelee kumuombea,huu ni uponyaji wa uti wake wa mgongo.” amesema Nyalandu katika mtandao wake wa facebook.Pia watoto Saidia na Wilson, pamoja na wazazi wao, walikwenda Hospitali kumuangalia Doreen leo  ambaye bado amelazwa akiendelea na matibabu.